సద్వ్యాపారముల్ నేర్పుమా!

ఒక్క పుత్రకామేష్టిని యోగమబ్బె,
రెండు చేతుల ప్రాప్తించె దండి ఫలము.
మువ్వురు సతులకొసగగ మురిపెముగను,
నల్వురదొ సుతులు జనించినారు కనుఁడు.

పంచచామరము

కులీనుడైన రాజు నిండుకుండ తీరు మానుచున్,
భలే భళీ యటంచు ముద్దు పాపలన్ ముదమ్మునన్
విలాసరీతి నుయ్యెలన్ వివేక గీతి పాడి వా
రలెల్లరన్ పరుండజేయు రాజసమ్ము చూడుమా!

శార్దూలవిక్రీడితము

వీరాగ్రేసర! ధాత్రికన్యకతమున్ వేవేల క్రూరాత్ములన్,
ధీరోదాత్తతతోడఁ గూల్చితి, భళా! దేవా! భువిన్ క్రూరతన్
స్వైరమ్మాడెడు ధూర్తమానవులకున్ సద్భావముల్, కూర్మితో
వైరమ్మెల్ల హరింపజేయగల సద్వ్యాపారముల్ నేర్పుమా!