చెయ్యెత్తి జై కొట్టు తెలుగోడా

చెయ్యెత్తి జై కొట్టు తెలుగోడా
గతమెంతో ఘన కీర్తి గలవోడా

వీర రక్తపు ధార వార వోసిన సీమ
పలనాడు నీదెరా వెలనాడు నీదెరా
బాల చంద్రుడు చూడ ఎవరోడోయ్
తాండ్ర పాపయ కూడ నీవోడోయ్ ||చెయ్యెత్తి ||

నాయకీ నాగమ్మ, మంగమాంబ, మొల్ల
మగువ మాంచాల నీ తోడ బుట్టిన వోళ్ళె
వీర వనితల గన్న తల్లేరా
ధీర మాతల జన్మ భూమేరా ||చెయ్యెత్తి ||

కల్లోల గౌతమి వెల్లువల క్రిష్ణమ్మ
తుంగభద్రా తల్లి పొంగిపొరలిన చాలు
ధాన్య రాశులు పండు దేశాన
కూడు గుడ్డకు కొదువ లేదోయి ||చెయ్యెత్తి ||

పెనుగాలి వీచింది అణగారి పోయింది
నట్టనడి సంద్రాన నావ నిలుచుండాది
ముక్కోటి బలగమై ఒక్కటై మనముంటే
ఇరుగు పొరుగూలోన ఊరు పేరుంటాది
తల్లి ఒక్కటె నీకు తెలుగోడా
సవతి బిడ్డల పోరు మనకేలా? ||చెయ్యెత్తి ||
==వేములపల్లి శ్రి కృష్ణ

ఏమి విశేషమో...........!

ఏమి విశేషమో నా భాగ్యవశమో
దేవదేవుని చరితమ్ము నాలకింప
మదిని గెలువగ రమణులభినయింపగ చూసినాను.
ఆదరము లేదందురే జనులకు కళలయందు
ఏడ దాచిరో వీరల గురువులు నిపుణమీరీతి
ముదము పొందగ మనసు మురియగ చూసినాను.
కనుల వుబికెను అమృత భాష్పధార
అధరముల పలికెను ఆనంద పదధార
- లక్ష్మీదేవి.

ఓ రోజు రాత్రి పదకొండింటికి టివి ఛానల్స్ మారుస్తూంటే ఒక నృత్యాభినయం చూశాను. ఆవేళ్టి నా భావ తరంగాలివి.
మహా భారతంలోని కొన్ని ఘట్టాలు, గోపికా కృష్ణుల కేళీ విలాసాలు ఎంతో హృద్యంగా అభినయించారు. తొమ్మండుగురు అమ్మాయిలు ఎంతో సమన్వయంతో, భక్తి శ్రద్ధలతో అభినయించడం చూసి పరవశించిపోయాను. ఆ కాలంలో నాటకాలు ఎంతో జనరంజకంగా ప్రదర్శించబడేవి అని విన్నాను. ఇప్పుడు వచ్చే సినిమాల్లో నాటక ప్రదర్శనని హాస్యం అనే పేరుతో ఎలా దిగజారుస్తున్నారో చూస్తే నాటకం చూసే ధైర్యం చేయలేం.

శ్రీ లక్ష్మీ శిరసా నమామి!!

శ్రీ లక్ష్మీ శిరసా నమామి!!

అనంత శయనుని సీమంతినీ!
అనంత దళ మధ్య స్థిరవాసినీ!
ఆనందామృత అంబుధివాసినీ!
సౌందర్యాధిదేవీ శ్రీ లక్ష్మీ!

దరహాస చంద్రికాయుత శోభినీ!
ధవళాంబర ప్రీతా మనమోహినీ!
మధుసూదనుని ప్రియభామినీ !
కామధేను రూపిణీ శ్రీ లక్ష్మీ!

ఈప్సితార్థదాయినీ చారుహాసినీ!
హస్తినాద ప్రియ మందగామినీ!
మదీయారాధ్య జగన్మోహినీ!
మనసాంబికే దేవి శ్రీ లక్ష్మీ!
- లక్ష్మీదేవి.